Police Don Recover Skeleton Of Man Wey Dem Kidnap For Bush

Police don recover di rotting skeleton of one 38-year-old kidnap victim, from one thick bush for Rivers State.

Rivers State Police Command identify di victim as Ereba Gospel Dinabari, afta dem discover im dead body for Alesa, Eleme Local Goment Area (wey be town wey dey around 20 kilometers east of Port Harcourt) on Wednesday 15 July.

Police tok tok pesin Nnamdi Omoni, wey cari tori pipo go di bush wia di carcass of Dinabari dey, say operatives of di Anti-Kidnapping Unit (of Rivers State Police Command) as dem dey investigate di kidnapping, arrest two suspects, 25 years old Osondu Uchendu and 23 year old Amebulem Amos for Alesa Eleme and na dem go show dem wia di dead body dey.

According to police, one of di main suspects Osondu Uchendu cari police and tori pipo go di Alesa bush wia e confess say him and e gang tie Dinabari to one tree till im die.

Uchendu confess say na on 15 May, 2020 dem kidnap Dinabari for Woji, Port Harcourt come demand One million naira ransom. But afta di family pay di ransom, dem no release am but come kill am for di bush. Police add.

Police tok tok pesin Nnamdi Omoni say dem go charge di suspects to court after dem conclude dia investigation as dem also recover di Toyota Camry car (Spider) of di victim from di suspects, wey also confess say dem don kidnap plenty pipo around Woji, Abuloma, Peter Odili Road for Port Harcourt and also for Eleme communities.

Dis no be di first time dis kain crime dey happen as e never too tay for May 2020, Police for Rivers State southern Nigeria on Friday dig out di deadibodi of three students: two males and one female wey dey school for University of Port Harcourt.

Kidnappers bin don gbab di students; Nelson Nwafor, Fortune Obemba and Joy Adoki on 7 April, 2020 from Choba, one of di host communities of di university and during investigation, on 30 April, 2020 police arrest three of di suspects, na wetin police tell BBC Pidgin.

For December, 2018 wey police bin don dig out di deadibodi of one girl, Ozigie Wovueze from di bedroom of her boyfriend, Ndema Owabie AKA JBoy for Wimpey area of Rumuepirikom inside Port Harcourt.

For November last year, police also comot one woman, Charity Ohaka wey her killers troway her deadibodyiinside well for Rumuosi (one area wey dey close to University of Port Harcourt) and about three years ago, tori of one Jumia delivery man wey dem kill and bury for soakaway, for Ada George area of Port Harcourt, too bin dey trend.

Few months ago naim police go exhume di three deadibody of students of University of Port Harcourt and Rivers State University from ETEO bush for Eleme, wia kidnappers bin also go bury dem dia

Be the first to comment

Leave a Reply

Your email address will not be published.